Savings Account: ప్రస్తుతం ఉన్న వివిధ రకాల బ్యాంకుల్లో ప్రతి ఒక్కరికీ అకౌంట్‌ ఉంటుంది. అయితే సేవింగ్స్‌ అకౌంట్‌పై వచ్చే వడ్డీపై పన్ను చెల్లించాల్సి ఉంటుందనే విషయం కొంత మందికే మాత్రమే తెలుసు. అయితే మీకు ఈ విషయం తెలిస్తే పన్ను ఆదా రూపంలో రూ. 10 వేల వరకు పొదుపు చేసుకోవచ్చు. ఇన్‌కమ్‌ ట్యాక్స్‌ రిటర్న్‌ దాఖలు చేసేటప్పుడు మీరు మీ సేవింగ్స్‌ ఖాతాలకు సంబంధించిన పూర్తి వివరాలను వెల్లడించాల్సి ఉంటుంది. ట్యాక్స్‌ రిటర్న్‌ ఫైల్‌ చేసే సెక్షన్‌ 80టీటీఏ గురించి తెలుసుకొని ఉండాలి. ఈ సెక్షన్‌ కిందనే మీరు సేవింగ్స్‌ ఖాతాలపై వచ్చే వడ్డీ మొత్తంపై పన్ను మినహాయింపు పొందొచ్చు. డిడక్షన్‌ క్లెయిమ్‌ చేసుకోవచ్చు.
సెక్షన్‌ 80 టీటీబీ కింద సీనియర్‌ సిటిజన్స్‌ రూ. 50 వేల వరకు తగ్గింపు పొందొచ్చు. సేవింగ్స్‌ అకౌంట్‌లోని డబ్బులపై వచ్చే వడ్డీ మొత్తంపై పన్ను మినహాయింపు రూపంలో ఈ ప్రయోజనం పొందొచ్చు. అంటే సాధారణ ట్యాక్స్‌ పేయర్లు (60 ఏళ్లలోపు) అయితే సేవింగ్స్‌ ఖాతాలపై ద్వారా వచ్చే వడ్డీ మొత్తంపై సెక్షన్‌ 80 టీటీఏ కింద రూ. 10 వేల వరకు తగ్గింపు సొంతం చేసుకోవచ్చు. ఇండివీజువల్స్‌ హెచ్‌యూఎఫ్‌ ఈ సెక్షన్‌ కింద పన్ను మినహాయింపు పొందొచ్చు.
ఎన్‌ఆర్‌ఐలకు కూడా ఈ బెనిఫిట్‌ అందుబాటులో ఉంది. అయితే షరతులు వర్తిస్తాయి. వీరికి ఎన్‌ఆర్‌వో సేవింగ్స్‌ అకౌంట్‌ ఉండాలి. అయితే ఇక్కడ మీరు ఒక విషయం గుర్తు పెట్టుకోవాలి. కొత్త ట్యాక్స్‌ విధానాన్ని ఎంచుకుంటే ఎలాంటి పన్ను మినహాయింపు ఉండదు. కేవలం పాత పన్ను విధానం ఎంచుకున్న వారికే ఇలా సేవింగ్స్‌ ఖాతాలపై అర్జించిన మొత్తంపై పన్ను మినహాయింపు ఉంటుంది. బ్యాంక్, కోఆపరేటివ్‌ బ్యాంక్, పోస్టాఫీస్‌ ఇలా మీరు ఎందులో అయినాసరే సేవింగ్స్‌ అకౌంట్‌ కలిగి ఉంటే.. వచ్చే వడ్డీపై పన్ను తగ్గింపు పొందొచ్చు. మల్టీపుల్‌ సేవింగ్స్‌ ఖాతాలపై కూడా ఈ ప్రయోజనం ఉంటుంది. అయితే కేవలం రూ.10 వేల వరకు మాత్రమే మినహాయింపు ఉంటుంది.
